Kerkimet Shkencore

Fakulteti i Mjekësisë, “qendra” e vetme e kërkimeve për sëmundje të ndryshme

Kërkimet e avancuara shkencore në Mjekësi nuk kryhen në asnjë nga institucionet shëndetësore përkatëse. Kjo do të thotë se në vendin tonë nuk ka asnjë mënyrë për të kryer zbulime të disa sëmundjeve apo kërkime në sektorë të caktuar të mjekësisë. Njëkohësisht, nuk ka asnjë specialist që të kryejë kërkime shkencore sipas profileve dhe kjo jo për faj të specialistëve, por sepse kjo gjë nuk është parë si prioritet kryesor nga vetë institucionet kompetente. Në vendin tonë nuk kryhen kërkime shkencore për shkak të mungesës së fondeve apo infrastrukturës së nevojshme. Një situatë e tillë është problematike për vendin tonë, pasi është e nevojshme që të kryhen kërkime në sektorë të caktuar të shëndetësisë. Të vetmet qendra ku mund të kryhen kërkime shkencore është Fakulteti i Mjekësisë dhe ISHP-ja. Specialistë të shëndetësisë sqarojnë se aktualisht Fakulteti i Mjekësisë nuk kryen asnjë kërkim dhe ISHP-ja ka disa kërkime të zbehta, që mund të quhen formale.

Kërkimet

Kërkimet shkencore janë të domosdoshme të kryhen dhe të përfshihen në të gjitha fushat dhe pastaj të përcaktohet ajo më prioritarja. Në të gjitha vendet e botës, ky është një nga sektorët më të investuar për shkak të rëndësisë që kanë zbulimet në rastet e prejardhjes së sëmundjeve, zbulimeve të ndonjë bari(medikamenti) për një lloj sëmundjeje etj. Vendi ynë nuk ka një traditë në kërkimet shkencore, pasi para disa vitesh ekzistenca e kërkimeve shkencore në shëndetësi ka ekzistuar, por ka qenë më tepër formale. Kjo vjen pasi ende nuk është bërë ndonjë zbulim i veçantë nga specialistët e shëndetësisë. Në Drejtorinë Spitalore të QSUT-së, që është dhe qendër universitare, nuk ka asnjë dokument që të vërtetojë që mjekët specialistë të kenë kryer ndonjë përpjekje për kërkime shkencore.

Fondet

Një ndër arsyet kryesore që ka lënë në heshtje këtë çështje është se qeveria nuk ka përcaktuar fonde që mund të vihen në funksion të drejtpërdrejtë për investimin e anës kërkimore-shkencore në mjekësi. Për të mundësuar ngritjen e kësaj qendre kërkimore do të duhet që gjithçka të niset nga fillimi, duke krijuar ambientet, aparaturat, duke mundësuar dhe pagesa të veçanta për të gjithë specialistët që do të merren me kërkimin shkencor të rasteve, sëmundjeve, medikamenteve të ndryshme.